Menu
Mbyllet faza e katërt e programit “Nxitja dhe e rritja e kapaciteteve të të rinjve në fushën e teknologjisë dhe inovacionit”.
Grupet e përzgjedhura nga fazat e mëparshme si dhe të mentoruara/këshilluara/trajnuara do të konkurrojnë në një konkurs të hapur për Startup.
Konkursi për start-up do të jetë një event në të cilin do të marrin pjesë edhe të rinj të kryeqytetit dhe do të konkurojnë me ide në fusha të ndryshme si teknologjia, inovacioni, sipërmarrja etj.
Programi është një mundësi shumë e mirë për të gjithë ata që duan të njohin më shumë botën e Startup dhe si funksionon ajo. Aktiviteti synon promovimin e inovacionit dhe sipërmarrjes tek të rinjtë pa marrë parasysh nëse janë pjesë e një biznesi dhe nëse fusha e tyre e ekspertizës është në teknologji dhe sipërmarrje, duke krijuar kështu një komunitet lokal të mendjeve sipërmarrëse dhe influencuesve të start-up për të mbështetur njëri-tjetrin dhe për t’u rritur së bashku, duke marrë reagime nga mentorët, për të prezantuar më pas përpara sipërmarrësve më të mirë dhe për të punuar së bashku në bizneset e së nesërmes.
Festivali përmbyllës do të jetë një festë për të gjithë procesin e zhvilluar deri në zgjedhjen e fituesve.
Të ftuar të eventit do të jenë të gjithë mësuesit përfaqësues të shkollave, drejtuesit e shkollave, aktorë të ekosistemit si dhe të rinjtë që kaluan fazën e fundit përzgjedhëse. Me një panel të përbërë nga aktorë të Bashkisë Tiranë si dhe përfaqësues të mentorëve apo jurive përgjatë projektit, konferenca do të prezantojë disa nga arritjet kryesore të projektit duke shfaqur video dhe foto përmbledhëse të tij si dhe shembuj suksesi.
Teknologjia dhe inovacioni prekin thuajse çdo aspekt të jetës e përditshmërisë tonë dhe mund të ofrojnë zgjidhje për probleme të shumta me të cilat përballet shoqëria.
Prandaj, ky program mirëpret ide inovative nga çdo fushë: një platformë për organizimin e komuniteteve, një aplikacion për reduktimin e ndotjes, teknologji që mbrojnë mjedisin, platforma që promovojnë artistët e rinj, aplikacione që ndihmojnë fermerët, zgjidhje inovative për trafikun e transportin, etj.
